Halos sampung taon na ang nakaraan mula nang sumabak ang mga dating artista hopefuls sa Starstruck, ang kauna-unahang talent search sa bansa na inilunsad noong Oktubre 2003. At sa pambihirang pagkakataon, muling nagsama-sama ang mga ngayo'y naglalakihang artista na sa industriya sa isang batch reunion. Masayang nagkantahan at nagbonding sina Jennylyn Mercado, Mark Herras, Yasmien Kurdi, Rainier Castillo, Jade Lopez, Sheena Halili, Katrina Halili at Cristine Reyes noong Enero 20 sa isang videoke bar sa Quezon City. Ayon pa kay Mark sa ulat ng H.O.T. TV nitong Linggo, matagal na raw nilang pinag-uusapan ang pagkakaroon ng reunion sa kanilang private Facebook group, ngunit madalas daw itong hindi natutuloy dahil sa kanilang mga commitments sa trabaho. Wika pa ng aktor, "Meron kaming private account sa Facebook. Tapos ayon, nakita ko na nag-uusap na pala sila doon, pinlano na namin yong reunion with Direk Lino, yong gabing yon mas more of talagang in-enjoy namin yong reunion namin lahat, yong pagkikita-kita naming lahat." Gayundin, iba raw yong pakiramdam para sa kanila noong natuloy na ang kanilang reunion. Ani Mark, "Masarap yong pakiramdam nong reunion kasi every time na may dumarating na batch namin sa pinto, yong parang nae-excite kaming lahat kung sino yong pupunta, kung sino yong darating noong gabi." Maliban dito, pakiramdam ng aktres and new mommy na si Katrina ang pagiging mas matatag na samahan nilang mga Batch 1 "survivors." Aniya, "Ang hindi ko makakalimutan doon sa reunion namin is yong bonding namin tapos mas-feel namin yong friendship nong isa't-isa. Feeling ko mas naging intimate yong relationship ko sa kanila. Mas parang kapatid ko sila." Samantala, masaya naman daw si Sheena na napag-uusapan pa rin ang kanilang batch bagama't matagal na mula nong sumalang sila sa nasabing palabas. "Diba nag-post ako ng picture namin sa Instagram, actually yon ang pinakamaraming likes na picture ko. Na parang doon ko nakita na 'Wow!' Alam mo yong nag-comment talaga sila," kwento ni Sheena. Dagdag pa nito, "Ang daming pa rin palang fans ng Starstruck batch one. Iba pa rin pala talaga pag, sobrang swerte ko na kasama ako sa first. Parang big deal yong na nag-reunion yong Starstruck batch one. So na-feel ko na parang napaka-special pala nong batch namin." — Mac Macapendeg/BM, GMA News

January 27, 2013 6:45pm


Umaasa si Pangulong Benigno Aquino III na maisusumite ng National Bureau of Investigation ngayong linggo ang ulat nila sa shooting incident noong Enero 6 sa bayan ng Atimonan sa Quezon na nagresulta sa pagkamatay ng 13 katao.

Sa ulat ng government-run dzRB radio, sinabi ni Aquino na natapos na ang final report ng NBI noong Biyernes pa, ngunit nasa Switzerland siya ng mga panahong iyon.

Dagdag nito, inatasan ni Aquino ang NBI na huwag munang magpadala ng kopya ng ulat sa kanyang opisina upang maiwasan ang pag-leak nito.

Inatasan ni Aquino ang NBI na maging ang nag-iisang ahensya na mag-iimbestiga sa insidente. Iginiit ng mga pulis na shootout umano ang naganap sa pagitan nila at ng mga umano'y gun-for-hire syndicate.

Gayunpaman, naniniwala si Justice Secretary Leila de Lima na hindi shootout ang insidente.

Nakabalik ng bansa si Aquino mula sa kanyang pagbisita sa Switzerland nitong Linggo ng hapon.

Samantala, ayon sa ulat, nananatili umanong kontento si Aquino kay Executive Secretary Paquito Ochoa Jr. bilang ang pinuno ng Presidential Anti-Organized Crime Commission.

Naunang inihayag ng PAOCC na habang naisumite nga ang plano ng operasyon noong Ebero 6, hindi ito naaprubahan. — Amanda Fernandez/BM, GMA News